Quen somos
Somos Pandeireteiras é unha Asociación sen ánimo de lucro de mulleres tocadoras galegas constituida no ano 2023 co obxectivo de abrir un espazo permanente de articulación entre as mulleres pandeireteiras galegas, producindo narrativas colectivas propias e transmitindo o seu xeito de operar a través da sororidade, garantindo o seu legado musical e oral en lingua galega posicionandoa como lingua vehicular.
Obxectivos
Impulsar a lexitimación da representación social das pandeireteiras como centro da transmisión cultural no eido musical tradicional contemporáneo.
Favorecer a cohesión social e territorial das tocadoras.
Difundir o valor do noso patrimonio inmaterial a través da visualización, conexión e articulación das pandeireteiras e tocadoras de Galicia.
Xunta directiva
Gisela Sanmartín Novo
Presidenta
Nace en Fene e comeza no mundo da música tradicional aos 4 anos ao recibir clases de pandeireta e baile. Dende moi nova, vincúlase a numerosos grupos de baile e cantareiras da comarca de Ferrolterra, recibe clases de canto clásico e forma parte de diversos grupos folk ao longo da xeografía galega. É mestra das escolas de pandeireta e dirixe o grupo de Cantareiras Xirifeiras de Airiños de Fene, asociación á que pertenece dende nena e coa que traballa pola recuperación e dignificación da nosa música tradicional e das nosas cantareiras. Colaborou e formou parte de diversos proxectos musicais vinculados coa nosa tradición.
Mercedes Peón
Vicepresidenta
Artista multidisciplinar, compositora, investigadora. A súa primeira formación musical vén do percorrido polas aldeas durante 25 anos, recibindo e formando parte da transmisión colectiva da memoria oral e corporal. Galardoada co Premio Nacional de Música (2008), conta con numerosos recoñecementos, como Premio MacAllan (1991), artista do ano pola revista Folkworld (2000); mellor disco segundo Word Chart Music Europe (2011), Premio da Crítica Galega no eido da música (2018), mención no Festival de Sevilla polo tratamento sonoro da película Nación, de Margarita Ledo (2020). Recentemente obtivo o premio Mestre Mateo á mellor música orixinal polo film O Corpo Aberto (2023) e o premio Mulleres en Acción 2025.
Ana Fernández
Secretaria
Mestra de pandeireta e baile tradicional. Iníciase no folclore aos 10 anos na A.C. Rosalía de Castro de Padrón. Diplómase como mestra en educación infantil no 2007, ano no que comenzou a colaborar con Mercedes Peón coa pandeireta e a voz. Durante a súa traxectoria fórmase como cantante, actriz e educadora en igualdade e prevención da violencia de xénero; e é desde o feminismo que comeza a traballar con asociacións de mulleres nas que promove a pandeireta e o baile como xeito de expresión, como vía de liberación e desafogo colectivo. Actualmente dirixe agrupacións como a Asociación Cultural Rosalía de Castro de Padrón, as Escolas Municipais de Baile e Pandeireta de Brión e as Pandeireteiras As Atrevidas de Monte, de A Baña.
Mar da Bouzas
Tesoureira
Nacida na parroquia de Cerqueda (Malpica de Bergantiños). Con 6 anos toma aulas de baile tradicional no seo da Asociación Xuvenil Raigañas (formando parte da súa directiva dende fai máis de 30 anos), converténdose dende aquela nunha das súas paixóns. Aprende a tocar a pandeireta con 16 anos e, nunha recollida na súa parroquia, descubre que o seu avó paterno era bailador da Ribeirana e que as súas tías avoas eran tocadoras e bailadoras. Toma así conciencia da importancia de manter vivo o legado musical e cultural a través da transmisión ás novas xeracións, unha visión que, a día de hoxe, mantén coas súas compañeiras do grupo de pandeireteiras Raigañas.